काठमाडौँ – राष्ट्रिय सभामा नेकपा (माओवादी केन्द्र) की सांसद गंगाकुमारी बेल्वासेले प्रत्यक्ष कार्यकारी प्रमुखका लागि संविधान संशोधन भए पार्टी तयार रहेको बताएकी छन् ।
राष्ट्रिय सभाको मंगलबारको बैठकमा बोल्दै सांसद बेलवासेले प्रत्यक्ष कार्यकारी प्रमुख भएको खण्डमा देशमा स्थिरता आउन सक्ने बताइन् । नयाँ सरकारले संविधान संशोधन गर्ने कुरा गरेको भन्दै उनले संसद्लाई पूर्ण समानुपातिक बनाउन पनि अगाडि बढ्नुपर्ने धारणा राखिन् ।
‘नयाँ सरकार आएको छ, हामी संविधान संशोधन गर्छौँ भन्ने कुरा एउटा ज्वारभाटा जस्तो फैलिएको छ । निर्वाचन प्रणालीलाई दोष दिइएको छ । जनताबाट निर्वाचित हुने कार्यकारी प्रमुख निर्वाचन गर्न हामी पहिल्यैबाट तयार छौँ । त्यसलाई अगाडि बढाउँदा सरकार स्थिर हुनसक्छ । सरकार भनेजसरी चल्न सक्छ, ‘उनले भनिन्, ‘आँट गर्नुहुन्छ भने हामी सहयोग गर्नेछौँ । चुनाव खर्चिलो भयो भनेर समानुपातिकलाई दोष दिइएको छ, दलितलाई दोष दिइएको छ, महिलालाई दोष दिइएको छ । त्यस्तो होइन, पूर्ण समानुपातिक व्यवस्थामा जाऔँ । पूर्ण समानुपातिकमा जानका लागि निर्वाचन प्रणाली संशोधन गर्छ भने स्थिर सरकार निर्माण गर्न सकिन्छ ।’
अस्थिरताको दोष निर्वाचन प्रणालीलाई दिन नहुने उनको भनाइ थियो । समानुपातिक प्रणालीलाई दोष दिन नहुने र समावेशी व्यवस्थाले अस्थिर भयो भन्ने तर्क सही नभएको उनले बताइन् ।
