काठमाडाैं – नेपालकी पलेसा गोवर्द्धनले पेरिस पारा ओलम्पिक खेलकुद प्रतियोगितामा नेपाललाई ऐतिहासिक कांस्यपदक दिलाएकी छिन् । फ्रान्सको पेरिसमा शुक्रबार राति तेक्वान्दोअन्तर्गत के–४४ क्याटगोरीको महिला ५७ केजी तौल समूहको रिपाचेजको फाइनलमा उनले सर्बियाली खेलाडी मारिजा मिकेभलाई १५–८ ले हराउँदै कांस्य दिलाएकी हुन् । नेपाली खेलकुद इतिहासमै नेपालले पारा ओलम्पिकमा पहिलोपटक पदक जितेको हो । यसअघि नेपालको ऐतिहासिक पदक नै एसियाली खेलकुदमा रजत थियो ।
पलेसा नेपालका लागि पारा ओलम्पिकमा पदक जित्ने पहिलो नेपाली खेलाडी बनिन् । उनले जितेको कांस्य नेपाली खेलकुदकै अहिलेसम्मकै सबैभन्दा ठूलो पदक हो । यसअघि उनले रिपाचेजको पहिलो खेलमा फ्रान्सकी सोफी काभरजानलाई २–१ को स्कोरमा पराजित गरेकी थिइन् । यसअघि पलेसा विश्व नम्बर एक खेलाडी ब्राजिलियन सिल्भाना मायारा कार्डोस फर्नान्डेजसँग १०–८ ले पराजित भएकी थिइन् ।
उनले क्वार्टरफाइनलमा भेनेजुएलाकी भलेरिया मोराल्सलाई ३१–० को फराकिलो अन्तरमा हराएकी थिइन् । सन् २०२० को टोकियो ओलम्पिकमा उनी फाइनलमा चुकेकी थिइन् । २० वर्षीया पलेसाले चीनमा भएको एसियाली छनोटमा स्वर्ण पदक जितेर २०२४ को पेरिस पारा ओलम्पिकमा स्थान बनाएकी थिइन् । जन्मँदै बायाँ हत्केला नभएकी उनले १३ वर्षको उमेरमा खेल यात्रा सुरु गरेकी थिइन् ।
पलेसाले चीनमा आर्किटेक्चर अध्ययन गरिरहेकी छिन् र प्रशिक्षणका लागि ६ महिनाको बिदा लिएकी छिन् । एनले लामो समयदेखि सातदोबाटो खेलकुद कम्प्लेक्समा तालिम गरिरहेकी छिन् । मार्सल आर्टस्मा सधैँ रुचि राखेकी उनले आमाबुबाको पनि सधैँ साथ पाइन् । स्कुले जीवनमा अवसर पाएपछि उनले तेक्वान्दो खेलको अभ्यासलाई निरन्तरता दिइरहेकी छिन् ।
