लगातार उकालो लाग्दै सुनको मूल्यले मंगलबार पनि बनायो रेकर्ड
सुनको मूल्यले मंगलबार पनि रेकर्ड बनाउँदा चाँदीको मूल्य भने प्रतितोला पाँच रूपैयाँले घटेको नेपाल सुनचाँदी व्यवसायी महासंघले जनाएको छ।
काठमाडौं- यो साता लगातार उचाइतर्फ लागेको सुनको मूल्यले मंगलबार पनि रेकर्ड बनाएको छ।
आइतबार प्रतितोला एक हजार सातसय र सोमबार प्रतितोला चारसय रूपैयाँले उकालो लाग्दै लगातार कीर्तिमान कायम गरेको सुनको मूल्य मंगलबार पनि प्रतितोला पाँचसय रूपैयाँले बढेर यसअघिको रेकर्ड तोडेको हो।
मंगलबार नेपाली बजारमा सुनको मूल्य हालसम्मकै उच्च प्रतितोला एक लाख ५९ हजार सातसय रूपैयाँ पुगेको छ।
सोमबार सुन प्रतितोला एक लाख ५९ हजार दुईसय रूपैयाँमा कारोबार हुँदै रेकर्ड बनाएको थियो। आइतबार पनि कीर्तिमानी बिन्दुमा पुगेको सुनको मूल्यले मंगलबार पनि रेकर्ड बनाएको हो।
आइतबार प्रतितोला पाँच रूपैयाँले बढेर सोमबार स्थिर रहेको चाँदीको मूल्य भने मंगलबार प्रतितोला पाँच रूपैयाँले घटेको छ।
मंगलबारका लागि चाँदीको मूल्य प्रतितोला एक हजार ९ सय १५ रूपैयाँ तोकिएको छ।
लगातार बढिरहेको सुनको मूल्य भने विश्व बजारमा पनि ऐतिहासिक बिन्दुमा पुगिरहेको छ। अन्तर्राष्ट्रिय बजारमा सुनको मूल्यले नयाँ रेकर्ड बनाइरहेकाले त्यसको प्रभाव नेपाली बजारमा पनि देखिएको हो।
अहिले सुनको मूल्यमा उछाल आइरहनुको मुख्य कारण डलर इन्डेक्समा भइरहेको गिरावट नै मानिएको छ।
नेपालमा अन्तर्राष्ट्रिय मूल्यका आधारमा सुनको भाउ निर्धारण गरिन्छ। अन्तर्राष्ट्रिय बजारमा अघिल्लो दिन राति १२ बजे कायम भएको प्रतिऔँस सुनको मूल्य भोलिपल्ट भन्सार दर, बैंकको लागत र नाफा, वैदेशिक विनियम दर र व्यवसायीको नाफा जोडेर मूल्य तय गरिन्छ।
नेपालमा सुनको मूल्य निर्धारणको जिम्मा सुनचाँदी व्यावसायी महासंघलाई दिइएको छ। २०६६ सालअघि नेपालमा खुलारुपमा सुनको आयात गर्न पाइन्थ्यो। २०६६ पछि भने नेपाल राष्ट्र बैंकले बैंकिङ च्यानलबाट मात्रै सुनको आयात गर्न पाइने नियम बनायो। त्यतिबेला जुनसुकै वाणिज्य बैंकले दैनिक १० किलो सुन आयात गर्न सक्थे।
राष्ट्र बैंकले दैनिक सुन आयातको कोटालाई तल-माथि गर्दै आएको छ। आवश्यकताअनुसार राष्ट्र बैंकले सुनको कोटा निर्धारण गर्दै आएको छ। हाल दैनिक २० किलो सुन आयात गर्न पाइन्छ।
