काठमाडौँ । शुक्रबार राति पक्राउ परेका राष्ट्रिय स्वतन्त्र पार्टी (रास्वपा) सभापति रवि लामिछानेलाई आज रुपन्देही लगिदै छ ।
सहकारी ठगी र संगठित अपराधसम्बन्धी मुद्दा झेलिरहेका लामिछाने शुक्रबार उच्च अदालत तुलसीपुरको बुटवल बेन्चको आदेशपछि शुक्रबार साँझ काठमाडौंको हात्तीगौंडास्थित निवासबाटै पक्राउ परेका थिए ।
गएराती लामिछानेलाई जिल्ला प्रहरी परिसर काठमाडौंको हिरासतमा राखिएको छ भने आज उनलाई रूपन्देही जिल्ला अदालत पुर्याइने भएको छ।
जिल्ला अदालत रूपन्देहीको आदेश बदर गर्दै उच्च अदालतले लामिछानेलाई थुनामा पठाउने आदेश गरेको हो । न्यायाधीशद्वय रमेश ढकाल र स्वीकृति पराजुलीको संयुक्त इजलासले शुक्रबार उनलाई थुनामा पठाउने आदेश जारी गरेको थियो ।
\बुटवलको सुप्रिम सहकारी ठगी मुद्दामा उनलाई जिल्ला अदालत रूपन्देहीले उनलाई एक करोड धरौटीमा रिहा गरेको थियो । रविले फागुन १६ गते रूपन्देही अदालतको आदेश बदरको माग राखेर उच्च अदालत तुलसीपुरको बुटवल इजलासमा पुनरावेदन निवेदन दिएका थिए ।
अदालतबाट आदेश जारी हुनेबित्तिकै सामाजिक सञ्जालमार्फत लामिछानेले तत्काल गिरफ्तारी दिने बताएका थिए। ‘सम्मानित अदालतको आदेशको सम्मान गर्दै म आफैं आजै अहिल्यै गिरफ्तारी दिँदै छु ।’ साथै उनले न्यायका लागि दुनियाँका सबै ढोका ढकढक्याउने बताएका थिए ।
