काठमाडौँ । नेपाली काँग्रेसको बैठकमा केन्द्रीय समिति र आम चुनावमा ४० मुनिका २० प्रतिशत अनिवार्य गर्न प्रस्ताव भएको छ ।
सानेपामा जारी केन्द्रीय समिति बैठकमा केन्द्रीय सदस्य उर्मिला थपलियाले केन्द्रीय महाधिवेशन प्रतिनिधिलाई प्रदेश कार्यसमितिमा निर्वाचन लड्न नपाउने व्यवस्था गर्नुपर्ने माग राखिन् ।
उनले भनिन्, ‘केन्द्रीय महाधिवेशन प्रतिनिधिले प्रदेश अधिवेशनमा भाग लिन पाउने तर चुनाव लड्न नपाउने व्यवस्था गरौँ । प्रदेश प्रतिनिधिहरूकै प्रदेश कार्यसमितिमा आउनुपर्छ । पार्टीमा युवा प्रतिनिधित्व बढाउनुपर्छ । त्यसका लागि पार्टी केन्द्रीय समिति, सङ्घ, प्रदेश र स्थानीय तहको निर्वाचनमा पार्टीबाट उम्मेदवार छान्दा ४० वर्ष मुनिका २० प्रतिशत युवा अनिवार्य गरौँ ।’ उनले पार्टीको वडा कार्यसमितिलाई मजबुत बनाउन केन्द्रले छुट्टै कार्यक्रम ल्याउनुपर्ने सुझाइन् ।
उनले थपिन्, ‘खल्तीबाट बजेट हाल्ने सिस्टम गलत छ । आयोजना बैंक बनाएर आवश्यकताअनुसार बजेट हाल्ने गर्नुपर्छ । यसो भएमा बिचौलिया र कर्मचारीतन्त्र हाबी हुन रोकिन्छ ।’ नेविसंघ पूर्वमहामन्त्री समेत रहेकी थपलियाले भातृ तथा शुभेच्छुक संस्थाको अधिवेशन २र२ वर्षमा अधिवेशन अनिवार्य गर्नुपर्ने बताइन् ।
