काठमाडौँ- सरकारले आजदेखि चाडपर्वलक्षित सुपथ मूल्य पसल सञ्चालन गरेको छ । उद्योग, वाणिज्य तथा आपूर्ति मन्त्रालय अन्तर्गतका दुई व्यापार कम्पनी खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेशन लिमिटेडले देशभरका विभिन्न स्थानमा सुपथ मूल्य पसल सञ्चालन गरेका हुन् ।
यी पसलबाट दैनिक उपभोग्य वस्तुमा प्रतिकिलो २ रुपैयाँदेखि १० रुपैयाँसम्म छुट दिने जनाइएको छ ।
भदौ ८ गतेको मन्त्रीस्तरको निर्णयअनुसार खाद्यले देशको ४५ जिल्लाका १११ स्थानमा र साल्ट ट्रेडिङ कर्पोरेशनले ३८ स्थानमा सुपथ मूल्य पसल सञ्चालन गर्ने तयारी भएको थियो । जेनजी पुस्ताको आन्दोलनका कारण प्रभावित क्षेत्रमा भने क्रमिक रूपमा पसल सञ्चालन गरिने जनाएको छ ।
खाद्य व्यवस्था तथा व्यापार कम्पनीका प्रमुख कार्यकारी अधिकृत रमेश आचार्यका अनुसार आजदेखि पसल सञ्चालनमा आएका छन् । ‘प्रभावित केही स्थानमा आजैदेखि सञ्चालन नभए पनि क्रमिक रूपमा सञ्चालन गर्दै लगिनेछ । केही स्थानमा आजै पूर्वाधारको कमी वा उपकरणको अभावका कारण सञ्चालन नभ्याउन सकिन्छ,’ आचार्यले भने, ‘तर एक हप्ताभित्र सबै ठाउँमा पूर्ण सञ्चालनमा आउनेछन् ।’
यस्तै खाद्यले खसी–च्याङ्ग्रा बिक्री गर्नेबारे अन्योल बढेको छ । खसी–च्याङ्ग्रा बिक्रीका लागि भदौ १६ गते खाद्यले अनलाइनमार्फत् अग्रिम बुकिङ खुला गरेको थियो । करिब ४० वटाको संख्यामा खसी–च्याङ्ग्रा अर्डर आए पनि अहिलेसम्म खरिद कार्य नभएकाले बिक्री गर्ने या नगर्ने भन्नेबारे अन्योल रहेको आचार्यको भनाइ छ ।
‘खसी–च्याङ्ग्रा अनलाइन बुकिङ भइरहेको थियो तर अहिले बन्द गरिएको छ,’ उनले भने, ‘यसपाली खसी–च्याङ्ग्रा ल्याउन सकिन्छ कि सकिँदैन भन्नेबारे मन्त्रालयमा छलफल भइरहेको छ ।’
हेटौँडा, मकवानपुर, नवलपरासी र दाङबाट खसी–बोका र मुस्ताङबाट च्याङ्ग्रा ल्याएर बिक्री गरिँदै आएको छ । मुस्ताङबाट च्याङ्ग्रा ल्याउन ८–९ दिन लाग्ने र बाटोमा तौल घट्ने तथा मर्ने सम्भावनासमेत हुन्छ । यसकारण च्याङ्ग्रा ल्याउने सम्भावना न्यून रहेको आचार्यले बताए ।
खसी–च्याङ्ग्रा ल्याउन नसकेमा अनलाइनमार्फत आएको अर्डरका क्रममा अग्रिम भुक्तानी भएको पैसा फिर्ता गरिने उनको भनाइ छ ।
सुपथ मूल्य पसलमा कुन वस्तुमा कति छुट ?
खाद्यले सञ्चालन गर्ने सुपथ मूल्य पसलमा सबै किसिमका चामलमा प्रतिकिलो ५ रुपैयाँ छुट दिइनेछ । यस्तै गहुँ दाना, चिनी, सबै किसिमका दाल र चना, भटमास, केराउसमेतका गेडागुडीमा प्रतिकिलो ५/५ रुपैयाँ छुट दिइनेछ ।
यस्तै चिउरा, आँटा, पिठो, मैदामा प्रतिकिलो ७ रुपैयाँ छुट दिइनेछ । जिरा, धनियाँ, चियापत्ती र जिउँदो खसी–बोका र च्याङ्ग्रामा प्रतिकिलो १०÷१० रुपैयाँका दरले छुट दिने जनाइएको छ । तोरी, सनफ्लावर र भटमासको तेलमा प्रतिलिटर ७÷७ रुपैयाँ छुट दिइनेछ । रैथाने खाद्यवस्तुमा १०÷१० रुपैयाँ छुट दिने जनाइएको छ, जसमा कर्णालीको सिमी, फापर दाना, चिनो, कागुनो, उवा र जुम्ली मार्सी तथा बासमती चामल छन् ।
यस्तै साल्ट ट्रेडिङबाट सञ्चालन हुने सुपथ मूल्य पसलमा नुनमा प्रतिकिलो २ रुपैयाँ, चिनीमा प्रतिकिलो ५ रुपैयाँ, तेल, चिउरा, पिठो मैदा र दालमा प्रतिकिलो ७ रुपैयाँ छुट दिने जनाइएको छ ।
खाद्यका पसल कहाँ–कहाँ ?
खाद्य व्यवस्थाले कोशी प्रदेशमा ११ स्थानबाट सुपथ मूल्य पसल सञ्चालन गर्नेछ । जसअनुसार झापाको मुख्य शाखा कार्यालय बिर्तामोड, ताप्लेजुङ शाखा कार्यालय, मोरङको प्रादेशिक कार्यालय विराटनगर, भोजपुरको शाखा कार्यालय, संखुवासभाको शाखा कार्यालय र हटियागोला बिक्री केन्द्र (भोटखोला गाउँपालिका), सोलुखुम्बु शाखा कार्यालय, ओखलढुंगा शाखा कार्यालय र कालिका खरिद बिक्री केन्द्र (चम्पादेवी गाउँपालिका)मा र खोटाङको शाखा कार्यालयबाट सुपथ मूल्य पसल सञ्चालन हुनेछ ।
मधेस प्रदेशमा तीन स्थानमा सुपथ मूल्य पसल सञ्चालन हुनेछ । सिरहामा मुख्य शाखा कार्यालय लहान, धनुषामा प्रादेशिक कार्यालय जनकपुर र पर्सामा शाखा कार्यालय वीरगन्जबाट सुपथ मूल्य पसल सञ्चालन गरिने जनाइएको छ ।
खाद्य व्यवस्थाले बागमती प्रदेशमा पाँच स्थानबाट सुपथ मूल्य पसल सञ्चालन गर्दैछ । जसअनुसार काठमाडौँ उपत्यकामा थापाथली, रामशाहपथ, दक्षिणकाली बिक्री केन्द्र, ललितपुरको नख्खु खाद्य गोदामबाट सुपथ मूल्य पसल सञ्चालन गरिनेछ । यसैगरी रसुवाको धुन्चेमा यस्तो पसल सञ्चालन हुनेछ ।
गण्डकी प्रदेशमा ७ स्थानबाट सुपथ मूल्य पसल सञ्चालन हुनेछ । कास्कीको बिरौटा बिक्री केन्द्र, तनहुँको विमलनगर बिक्री केन्द्र, गोरखामा शाखा कार्यालय गोरखा र डिपो कार्यालय सिर्दिबास, लमजुङको सुन्दरबाजार खरिदबिक्री केन्द्र, मनाङ शाखा कार्यालय र मुस्ताङ शाखा कार्यालयबाट सुपथ मूल्य पसल सञ्चालन हुनेछ ।
लुम्बिनी प्रदेशमा १५ स्थानमा सुपथ मूल्य पसल सञ्चालन हुनेछ । रुपन्देहीमा भैरहवा र बुटवल हाटबजार, बाँकेमा मुख्य शाखा कार्यालय नेपालगञ्ज, दाङमा मुख्य शाखा कार्यालय तुलसीपुर, बर्दियामा मुख्य शाखा कार्यालय राजापुर र रोल्पामा शाखा कार्यालय लिवाङ, गुल्मीमा शाखा कार्यालय तम्घास र बलेटक्सार बिक्री केन्द्र रहनेछन् ।
रोल्पामा पतलाचौर खरिदबिक्री केन्द्र (परिवर्तन गाउँपालिका), घर्तीगाउँ खरिद बिक्री केन्द्र (माडी), सुलीचौर खरिदबिक्री केन्द्र र बडाचौर खरिदबिक्री केन्द्रबाट सुपथ मूल्य पसल सञ्चालन हुनेछ । रुकुमपूर्वमा शाखा कार्यालयबाट यस्तो पसल सञ्चालन हुनेछ ।
कर्णालीका ४२ स्थानमा सुपथ मूल्य सञ्चालन गरिने भएको छ । सुर्खेतमा सिम्ता खरिदबिक्री केन्द्र, चौकुने खरिदबिक्री केन्द्र र पञ्चपुरी खरिदबिक्री केन्द्र, जाजरकोट शाखा कार्यालय, दसेरा डिपो, घोगी डिपो, नायक वडाघाट, चौखा डिपो, रजुतारा बिक्री केन्द्र, कालीमाडी खरिद बिक्री केन्द्रबाट सञ्चालन हुनेछ ।
जुम्लामा शाखा कार्यालय र धापा डिपो, मुगुमा शाखा कार्यालयु, डिपो सोरुकोट, डिपो पुलु र श्रीकोट डिपोबाट यस्तो पसल सञ्चालन हुनेछ । दैलेखमा शाखा कार्यालय, नौमुले बजार खरिदबिक्री केन्द्र, घोडाबास खरिदबिक्री केन्द्र, वेस्तडा बिक्री केन्द्र भगवतीमाई, राकम खरिदबिक्री केन्द्रबाट सुपथ मूल्य पसल सञ्चालन हुनेछ । यस्तै डोल्पाको शाखा कार्यालय दुनै, जुफाल डिपो, सर्मी डिपो, काईगाउँ त्रिपुराकोट बिक्री केन्द्र, साल्दाङ बिक्री केन्द्र, धो बिक्री केन्द्र, काककोट बिक्री केन्द्रबाट सुपथ मूल्य पसल सञ्चालन हुनेछ ।
रुकुमपश्चिम शाखा कार्यालय, कालीकोटमा शाखा कार्यालयका साथै डिपो खल्लागाड, डिपो पादमघाट, डिपो थिर्पू, भैसासैना खरिद बिक्री केन्द्र, कुमालगाउँ र आरसीपी बजार खरिद बिक्री केन्द्रबाट सुपथ मूल्य पसल सञ्चालन हुनेछ । हुम्लामा शाखा कार्यालय हुम्ला, डिपो श्रगर, सर्केगाढ डिपो र यलवाङ बिक्री केन्द्र नाम्खाबाट पसल सञ्चालन हुनेछ ।
सुदूरपश्चिम प्रदेशका ९ वटै जिल्लाका २८ स्थानमा सुपथ मूल्य पसल सञ्चालन हुनेछ । यसमध्ये बझाङमा शाखा कार्यालय, दौलीचौर खरिद बिक्री केन्द्र, थलारा खरिद बिक्री केन्द्र, भातेखोला र तलकोट खरिद बिक्री केन्द्रबाट सञ्चालन हुनेछ ।
कैलालीको धनगढी, डडेलधुराको खलंगा बजार, कञ्चनपुरको शाखा कार्यालय महेन्द्रनगर, डोटीको खलंगा बजार र मौवानगर खरिदबिक्री केन्द्रमा सुपथ मूल्य पसल सञ्चालन हुनेछ । यसैगरी बाजुराको शाखा कार्यालय मार्तडी, डिपो कार्यालय कोल्टी, धुलाचौर बिक्री केन्द्र, बिच्छाया बिक्री केन्द्र र पाण्डुसैन बिक्री केन्द्रमा सुपथ मूल्य पसल सञ्चालन हुनेछन् ।
बैतडीको गोठालापानी र परचौडीहाट बिक्री केन्द्र, रोलेश्वर, आम्चौरा र दोगडाकेदार खरिदबिक्री केन्द्र, दार्चुलाको शाखा कार्यालय, सुनकेसरा बिक्री केन्द्र, हिकिला र खण्डेश्वरी खरिद बिक्री केन्द्रबाट सुपथ पसल सञ्चालन हुनेछ ।
अछामको शाखा कार्यालय मंगलसेन, सैनाबजार, साफेबगर र कमल बजार खरिदबिक्री केन्द्रबाट चाडपर्व लक्षित सुपथ मूल्य पसल सञ्चालन हुनेछ ।
साल्ट ट्रेडिङको पसल कहाँ–कहाँ सञ्चालन हुन्छ ?
साल्ट ट्रेडिङ कर्पोरेसन लिमिटेडले देशका ३८ स्थानमा सुपथ मूल्य पसल सञ्चालन गर्ने भएको छ । यसमध्ये काठमाडौँ उपत्यकामा कालीमाटी, सतुङ्गल, जावलाखेल, कोटेश्वर, सिफल, कपन, बालाजु, भक्तपुरको सल्लाघारी, कौशलटार, काँडाघारी, इमाडोल र महाराजगञ्जमा सुपथ मूल्य पसल सञ्चालन हुनेछ ।
यसैगरी काठमाडौँमा तीनवटा घुम्ती पसल सञ्चालन गर्ने साल्ट ट्रेडिङले जनाएको छ । झापाको विर्तामोड, मोरङको विराटनगर, सप्तरीको राजविराज, सिरहाको लहान, धनुषाको जनकपुर, पर्साको वीरगञ्जमा सुपथ मूल्य पसल सञ्चालन गर्ने जनाएको छ ।
नुवाकोटको त्रिशूली, मकवानपुरको हेटौँडा, चितवनको नारायणगढ, रुपन्देहीको भैरहवा, कपिलवस्तुको कृष्णनगर र दाङ जिल्लामा समेत सुपथ मूल्य सञ्चालन हुने भएको छ । यस्तै, कास्की, बागलुङ, डडेल्धुरा, कैलालीको धनगढी, टीकापुर र अत्तरिया, कञ्चनपुरको बेलौरी र महेन्द्रनगर, डोटीको दिपायल, काभ्रेको धुलिखेल, सुर्खेत, बैतडीको पाटन, बाँके नेपालगञ्चमा सुपथ मूल्य पसल सञ्चालन गर्ने जनाएको छ ।
