काठमाडौं – आगामी प्रतिनिधिसभा सदस्य निर्वाचनका लागि निर्वाचन आयोगले देशभरका मतदानस्थलहरूको विस्तृत पुनरावलोकन गर्दै संरचनामा महत्वपूर्ण समायोजन गरेको छ। मतदाताको सहजता र पहुँच सुधार गर्ने उद्देश्यसहित आयोगले देशका विभिन्न स्थानमा १६८ नयाँ मतदानस्थल थपेको छ।
त्यस्तै, भौतिक रूपमा जीर्ण, पहुँचमा अपायक वा प्रयोगमै नरहेका ९३ मतदानस्थल खारेज गर्ने निर्णय पनि आइतबार बसेको आयोग बैठकले गरेको हो।
यससँगै देशभर रहेका १० हजार ८९२ मतदानस्थलमा ७५ थपिँदै कुल संख्या १० हजार ९६७ पुगेको आयोगका प्रवक्ता नारायणप्रसाद भट्टराईले जानकारी दिए।
पुनरावलोकनका क्रममा आयोगले मतदानस्थलका नाम तथा ठेगानामा देखिएका त्रुटिहरू सच्याउने, मतदातालाई बढी अनुकूल हुने स्थानमा केही मतदानस्थल स्थानान्तरण गर्ने र केहीलाई नजिकैका मतदानस्थलमा समायोजन गर्ने कार्यसमेत सम्पन्न गरेको छ।
आयोगका अनुसार, यी समायोजन आगामी निर्वाचनलाई थप व्यवस्थित, सुरक्षित र सहज बनाउने महत्वपूर्ण तयारीका रूपमा अघि बढाइएको हो।
