काठमाडौं । नेपाली कांग्रेसले राष्ट्र निर्माणको अभियानमा सहभागी भएर लोकतान्त्रिक मूल्य र आदर्शलाई थप सशक्त बनाउनका लागि इच्छुक नागरिकलाई पार्टी आवद्ध हुन आह्वान गरेको छ ।
देश र लोकतन्त्रको सुदृढीकरणका लागि नयाँ सोच, नवीन ऊर्जा र अनुभवी व्यक्तिहरूको सहभागिता अपरिहार्य रहेको भन्दै कांग्रेसले विभिन्न पेशा–व्यवसायमा आवद्ध नागरिकलाई कांग्रेसले पार्टीमा आवद्ध हुन आह्वान गरेको हो ।
‘ऐतिहासिक संक्रमणको घडीमा, वैकल्पिक शक्ति निर्माणमा विश्वास राख्ने, समाजका विभिन्न प्रतिष्ठित पेशा—चिकित्सा, शिक्षा, कानून, उद्योग, सूचना–प्रविधि, कृषि, श्रम तथा नागरिक समाजका क्षेत्रमा सक्रिय भई राजनीतिक पृष्ठभूमिसँग जोडिएर समाज रूपान्तरणमा योगदान गर्न चाहनु हुने सम्पूर्ण महानुभावहरूलाई नेपाली कांग्रेसमा आबद्ध हुन हार्दिक आह्वान गर्दछौं,’ कांग्रेस प्रवक्ता प्रवक्ता देवराज चालिसेद्वारा शुक्रबार जारी विज्ञप्तिमा भनिएको छ ।
कांग्रेस सधैं विचार, विवेक र प्रतिबद्धताको संगम भएको लोकतान्त्रिक मञ्च भएको उल्लेख गर्दै पार्टीमा व्यक्तिको क्षमताभन्दा संस्थागत मूल्यलाई प्राथमिकता दिइने गरेको र पारदर्शिता, जवाफदेहिता तथा नीतिमा आधारित राजनीतिलाई अवलम्बन गरिएको विज्ञप्तिमा उल्लेख छ ।
बदलिएको समय, रुपान्तरित राजनीतिक चेतना र नयाँ नेतृत्वको स्पष्ट दृष्टिसहित कांग्रेस देशलाई सुशासन, समावेशिता र समृद्धितर्फ अग्रसर गराउने दृढ संकल्पमा अघि बढिरहेको प्रवक्ता चालिसेको भनाइ छ ।
