काठमाडौँ । गृह मन्त्रालयले निर्वाचन सुरक्षामा प्रतिकूल असर पार्न सक्ने उत्तेजक तथा भड्काउ अभिव्यक्ति र गतिविधि नगर्न सरोकारवाला सबै पक्षलाई चेतावनी दिएको छ। गृहमन्त्री ओमप्रकाश अर्याल सहितको सुरक्षा समन्वय बैठकले पछिल्ला दिनहरूमा विभिन्न जिल्लामा देखिएका घटनाक्रमप्रति ध्यानाकर्षण जनाउँदै कानुन विपरीत गतिविधि नगर्न सचेत गराएको हो।
मन्त्रालयका अनुसार निर्वाचन लक्षित कार्यक्रमहरूका क्रममा राजनीतिक दलका नेताबीच आरोप-प्रत्यारोप, उत्तेजनात्मक अभिव्यक्ति, दलका झण्डा जलाउने, त्यसको विरोधमा जुलुस निकाल्ने तथा टायर बाल्ने जस्ता गतिविधि बढ्दो क्रममा देखिएका छन्। साथै निर्वाचन प्रक्रियाको विपक्षमा सार्वजनिक अभिव्यक्ति दिने प्रवृत्तिप्रति पनि गम्भीर चासो व्यक्त गरिएको छ।
निर्वाचन प्रचारप्रसारको समयमा यस्ता गतिविधिले सुरक्षा व्यवस्थामा अवरोध उत्पन्न गर्न सक्ने भन्दै मन्त्रालयले सबै राजनीतिक दल, उम्मेदवार तथा समर्थकलाई कानुनी व्यवस्था र निर्वाचन आचारसंहिताको सीमाभित्र रही गतिविधि सञ्चालन गर्न आग्रह गरेको छ। उल्लंघन भएको पाइएमा प्रचलित कानुनअनुसार कारबाही हुने चेतावनी समेत दिइएको छ।
