म्याग्दी — राष्ट्रिय आविष्कार केन्द्रका संस्थापक तथा समाजसेवी महावीर पुनले आफ्नो जीत निश्चित भएको बताउँदै समर्थकहरूलाई विजय जुलुस ननिकाल्न आग्रह गरेका छन्। सामाजिक सञ्जालमार्फत सन्देश जारी गर्दै उनले बेनीमा विजय जुलुस निकाल्न समय र पैसा खर्च गरेर नआउन अनुरोध गरेका हुन्।
पुनले भनेका छन् कि चुनावमा हार्ने प्रतिस्पर्धीहरूलाई उडाउनु वा अपमान गर्नु उचित नहुने भएकाले विजय जुलुसजस्ता गतिविधि नगर्नु राम्रो हुन्छ। उनले आगामी दिनमा जिल्लाको विकासका लागि विपक्षीहरूसँग मिलेर काम गर्नुपर्ने आवश्यकता रहेको पनि उल्लेख गरेका छन्।
“जीत पक्का भयो। त्यसैले फेरि पनि भन्छु—बेनीमा विजय जुलुस निकाल्न कोही पनि पैसा र समय खर्च गरेर नआउनु होला,” पुनले आफ्नो सन्देशमा उल्लेख गरेका छन्।
उनले नारा, जुलुस, भोजभतेर जस्ता आडम्बरी कार्यक्रमहरू आफूलाई मन नपर्ने बताउँदै समर्थकहरूलाई सरल तरिकाले खुसी मनाउन सुझाव दिएका छन्। आफ्नो जीतको खुसी मनाउन चाहनेहरूलाई उनले आफ्नै गाउँघरमै साधारण तरिकाले मनाउन आग्रह गरेका छन्।
पुनले म्याग्दीको समग्र विकासका लागि सबै पक्षसँग सहकार्य गरेर अगाडि बढ्ने प्रतिबद्धता पनि व्यक्त गरेका छन्।
