काठमाडौं। नेपाल आयल निगमले उपभोक्तालाई अबदेखि खाना पकाउने एलपी ग्यास आधा सिलिन्डर मात्रै वितरण गर्ने निर्णय गरेको छ।
बिहीबार बसेको निगमको सञ्चालक समितिको बैठकले बजारमा देखिएको ग्यास अभावलाई ध्यानमा राख्दै यस्तो निर्णय गरेको हो। निगमका कार्यकारी निर्देशक चण्डीकाप्रसाद भट्टका अनुसार पछिल्लो समय उपभोक्ताहरूले आवश्यकताभन्दा बढी ग्यास सिलिन्डर भण्डारण गर्न थालेपछि बजार व्यवस्थापन गर्न कठिन भएको थियो।
उनले ग्यासको कृत्रिम अभाव रोक्न र सबै उपभोक्तासम्म ग्यासको पहुँच सुनिश्चित गर्न अस्थायी रूपमा आधा सिलिन्डर मात्रै वितरण गर्ने व्यवस्था लागू गरिएको जानकारी दिए।
पछिल्लो दुई महिनादेखि नेपाली बजारमा एलपी ग्यासको अभाव देखिँदै आएको छ। अन्तर्राष्ट्रिय बजारमा आपूर्ति प्रभावित हुनु तथा मध्यपूर्व क्षेत्रमा बढ्दो द्वन्द्वका कारण ग्यास आपूर्तिमा समस्या आएको बताइएको छ।
