पूर्वसभामुख कृष्णबहादुर महराविरुद्ध भ्रष्टाचार मुद्दा दायर

७३० थान भेपमा लुकाएर ल्याइएको करिब साढे ८ किलो सुन हिनामिना गरेको आरोपमा अख्तियारले ७ करोड ७८ लाख ६८ हजार ९५ रुपैयाँ बिगो दाबी गर्दै विशेष अदालत काठमाडौंमा आरोपपत्र दायर गरेको हो।

अनुसन्धानअनुसार चिनियाँ नागरिक ली हाङ सोङले २०७९ पुस १० गते फ्लाई दुबईमार्फत उक्त सुन ल्याएका थिए। भन्सार जाँचका क्रममा एक्स-रे मेसिनले शंकास्पद वस्तु देखाएपछि सामान रेड च्यानलमा पठाइएको थियो। तर, भन्सार कर्मचारीहरूले तस्करसँगको मिलेमतोमा सुन बरामद नगरी गोदाममा राखेर पछि चोरी गरेको आरोप छ।

अख्तियारका अनुसार भन्सार प्रमुखकै कार्यकक्षमा सेटिङ गरी गोदामबाट सुन भएको भेप निकालेर त्यसको सट्टा नक्कली भेप राखिएको थियो। सीसीटीभी नभएको स्थानमा सामान सारेर सुन निकालिएको र पछि बजारमा बिक्री गरेर अवैध आम्दानी गरिएको अनुसन्धानले देखाएको छ।

यस प्रकरणमा विमानस्थल भन्सार कार्यालयका तत्कालीन प्रमुख भन्सार प्रशासक अरुण पोखरेलसहित मुक्तिप्रसाद श्रेष्ठ र अम्बिकाप्रसाद खनाललाई मुख्य अभियुक्त बनाइएको छ। साथै अन्य भन्सार अधिकृत, कर्मचारी र सुरक्षा गार्डसमेत संलग्न रहेको भन्दै उनीहरूविरुद्ध पनि मुद्दा दायर गरिएको छ।

पूर्वसभामुख कृष्णबहादुर महरा र उनका छोरा रेशम (राहुल) महरालाई मतियारका रूपमा अभियोग लगाइएको छ। उनीहरूले भन्सार कर्मचारीलाई प्रभावमा पारेर सुन छुटाउन भूमिका खेलेको अख्तियारको दाबी छ।

यस्तै, विदेशी नागरिक र सुन बिक्री तथा रकम व्यवस्थापनमा संलग्न विभिन्न व्यापारीहरूलाई पनि प्रतिवादी बनाइएको छ। डेक्सटर ट्राभल्स एन्ड टुर्स प्रालिको खातामा समेत अवैध रकम जम्मा भएको पाइएको छ।

अख्तियारले सबै प्रतिवादीहरूबाट बिगो असुल गरी भ्रष्टाचार निवारण ऐन, २०५९ अनुसार कैद तथा जरिवानाको माग गरेको छ। साथै प्रमुख भन्सार प्रशासकको हैसियतमा कार्य गरेको भन्दै अरुण पोखरेलविरुद्ध थप सजायको मागसमेत गरिएको छ।