काठमाडौँ – सरकारले कर्मचारीहरूलाई १५-१५ दिनमा तलब दिने निर्णय गरेको छ। अर्थमन्त्री स्वर्णिम वाग्लेले अर्धमासिक रुपमा सरकारी कर्मचारीहरूलाई तलब दिने निर्णय गरेका हुन्।
हालसम्म महिना मरेपछि एकमुष्ट मासिक रूपमा तलब दिने गरिएकोमा, कर्मचारीहरूको आर्थिक सहजताका लागि मन्त्रालयले नयाँ व्यवस्था सुरु गर्न लागेको हो।
अर्थमन्त्री वाग्लेले स्तरबाट वैशाख ४ गते गरेको निर्णयअनुसार महिनामा दुई पटक तलब र भत्ताको भुक्तानी हुनेछ। अर्थ मन्त्रालयले यो व्यवस्था मिलाउन महालेखा नियन्त्रक कार्यालयलाई निर्देशन दिएको छ।
कर्मचारीहरूको दैनिक खर्च व्यवस्थापनमा सहजता ल्याउन र नगद प्रवाहलाई बजारमा चलायमान बनाउन यो कदम चालिएको हो। यसअघि मासिक रूपमा भुक्तानी हुँदा कर्मचारीहरूलाई महिनाको मध्यतिर आर्थिक दबाब पर्ने गरेको गुनासोलाई सम्बोधन गर्दै यो ‘अर्धमासिक’ प्रणाली अघि सारिएको हो।
