काठमाडौं – चीनको तिब्बत क्षेत्रमा भारी वर्षापछि भोटेकोशी नदीमा ठुलो बाढी आएको छ। यसले रसुवामा अकल्पनीय क्षति गरेको छ। जल तथा मौसम विज्ञान विभागको भोटेकोशीस्थित रसुवा–स्याप्रुवेसी जल मापन केन्द्रका अनुसार रसुवामा मंगलबार बिहान ३ः३० बजे बाढी आइपुगेको देखिन्छ।
नारायणी नदी जलाधारको त्रिशुली उपजलाधार अन्तर्गत भोटेकोशी नदीमा तिब्बत क्षेत्रबाट ठुलो बाढी प्रवेश गरेको हो।
उक्त बाढी बिहान ५ बजे त्रिशुलीस्थित वेत्रावती पुगेको जल तथा मौसम विज्ञान विभागले जनाएको छ। बेत्रावती केन्द्रमा बहाब करिब साढे २ मिटर बढेको र हाल केही घट्दो क्रममा रहेको विभागको भनाइ छ।
विभागका अनुसार बाढीको प्रभाव त्रिशूली नदीको बुढीगण्डकी दोभान (वेनिघाट) आसपाससम्म पर्ने देखिन्छ। यो क्षेत्रका नदी किनारका स्थानीयलाई विभागले सतर्कता अपनाउन अनुरोध गरेको छ।
बाढी पूर्वानुमान शाखाले यस घटनाको अनुगमन गर्दै सम्भावित कारणको अध्ययन गरेको विभागको भनाइ छ।
