नेपाली कांग्रेसका महामन्त्री गगन थापाले संसद्मा पहिलो भएको पार्टी अहिले सडकमा आउँदा पनि सुध्रने छाँट नदेखाएकोमा चिन्ता व्यक्त गरेका छन्। उनले पार्टीको आगामी अधिवेशनलाई केवल आन्तरिक प्रक्रियाका रूपमा मात्र नभई देशप्रतिको जिम्मेवारी बोध, अहिलेको अवस्थाको चिन्ता र चिन्तनको विषयमा व्यापक रूपमा हेर्नुपर्ने बताएका छन्।
‘हामी संसद्को पहिलो पार्टी थियौँ। हामी सत्ता पक्ष थियौँ। तर आज हामी न सत्ता पक्षमा छौँ न प्रतिपक्षमा छौँ। आज हामी सडकमा आएका छौँ,’ वर्तमान अवस्थामा पार्टीको स्थितिको विश्लेषण गर्दै थापाले भनेका छन्, ‘आज आएर विश्वासको सङ्कटमा छौँ।’
महामन्त्री थापाले भाद्र २३ र २४ गते जेन जी आन्दोलनको सन्दर्भमा भएको उथलपुथल र राज्यबाट भएका अवाञ्छनीय क्रियाकलापको स्मरण गर्दै त्यति बेला जेन–जीले मात्र नभई सबै उमेरका मानिसले नातावाद, कृपावाद, असक्षमता र कुशासनको बारेमा व्यापक असन्तुष्टि देखाएको र नेपाली कांग्रेस पार्टीमाथि समेत प्रश्न उठाउँदै असन्तुष्टि व्यक्त गरेको बताएका छन्।
उनले धेरै नौजवानहरूले नेपाली कांग्रेसलाई ‘साहस नभई सम्झौतासँग, निष्ठा नभई भ्रष्टाचारसँग र आदर्शसँग नभई अवसरवाद’ सँग जोडेर हेरेको बताएका छन्।
महामन्त्री थापाले अहिलेको अवस्थामा पार्टी कहाँ र कसरी चुकेको छ भनेर गम्भीरतापूर्वक सोच्नुपर्ने र अधिवेशनलाई पार्टीको पुनर्जीवनको आधार बनाएर देशमा भएको ठुलो राजनीतिक तथा सामाजिक उथलपुथलप्रति नेपाली कांग्रेसले आत्म समीक्षा गर्नुपर्नेमा जोड दिएका छन्।
