हेटौँडा, फागुन २४ गते । प्रतिनिधिसभा सदस्य निर्वाचन २०८२ मा सम्भवतः कान्छो सांसदको रुपमा निर्वाचित हुनुभएको छ प्रशान्त उप्रेती । २५ वर्षको युवा उमेरमा प्रतिनिधि सभा सदस्य निर्वाचनमा मकवानपुर २ बाट राष्ट्रिय स्वतन्त्र पार्टी (रास्वपा) बाट उहाँ निर्वाचित हुनुभएको हो ।
देशभरबाट निर्वाचित सांसदहरूमध्ये उहाँ सबैभन्दा कान्छो उमेरको सांसद हुनुहुन्छ । नयाँ पुस्ताका उम्मेदवार उप्रेतीले पुराना दलका उम्मेदवारलाई फराकिलो मतान्तरले पराजित गर्दै आफ्नो राजनीतिक यात्रा सुरु गर्नुभएको हो।
प्रतिनिधि सभामा म्याग्दी १ बाट स्वतन्त्र ७१ वर्षीय महावीर पुन, मनाङ १ बाट नेपाली काँग्रेसका ७१ वर्षिय टेकबहादुर गुरुङ, रूकुम पूर्व १ बाट नेपाली कम्युनिस्ट पार्टीका ७० वर्षिय पुष्पकमल दाहाल प्रचण्ड बिजयी भइरहँदा मकवानपुरबाट विजयी हुनुभएका उप्रेती सबैभन्दा कम उमेरको सांसद हुनुहुन्छ ।
मनहरी गाउँपालिका –७ निवासी उप्रेतीले ३० हजार ५० मत प्राप्त गर्दै विजय हासिल गर्नुभएको छ । उहाँका निकटतम प्रतिस्पर्धी नेकपा (एमाले) का महेश बर्तौलाले १८ हजार ८४६ मत प्राप्त गर्नुभएको छ । उप्रेतीले बर्तौलाभन्दा ११ हजार २०४ मतान्तरले जित निकाल्न सफल हुनुभएको छ।
निर्वाचित भएपछि प्रतिक्रिया दिँदै उहाँले परिवर्तन चाहने र देश समृद्ध हुनुपर्छ भन्नेहरूको जित भएको बताउनुभयो । उहाँले भन्नुभयो, “आजको दिन ऐतिहासिक छ । हिजोको निराशालाई आशामा बदल्दै समाजमा सकारात्मकता फैलाउनु हाम्रो जिम्मेवारी हो ।”
उहाँले आफ्नो कार्यकालभरी जनमुखी भएर जनतामाझ रहने र उनीहरूका समस्या समाधानका लागि इमान्दार र नैतिक ढङ्गले पहल गर्ने प्रतिबद्धता व्यक्त गर्नुभयो । कान्छो उमेरमै राजनीतिमा प्रवेश गरेको आफूले फरक राजनीतिक शैलीमा काम गर्ने उहाँको भनाइ छ ।
पहिलो प्रयासमै उहाँले लामो समयदेखि वामपन्थी दलहरूको प्रभाव रहेको क्षेत्रमा विजय हासिल गर्नुभएको छ । मकवानपुर २ लाई २०४८ सालयता वामपन्थी दलहरूको ‘किल्ला’ मानिँदै आएको थियो । प्रतिनिधिसभा तथा संविधानसभा निर्वाचनहरूमा पनि यस क्षेत्रबाट वामपन्थी उम्मेदवारहरू नै विजयी हुँदै आएका थिए । यसपटक भने युवा उम्मेदवारले नयाँ इतिहास रच्न सफल हुनुभएको छ ।
विसं २०५७ साल जेठ १० गते जन्मनुभएका उप्रेती हाल काठमाडौं विश्वविद्यालयको शिक्षा सङ्कायमा नेतृत्व तथा व्यवस्थापन विषयमा शिक्षाशास्त्र (एमएड) अध्ययनरत हुनुहुन्छ । यसअघि उहाँले नेपाल एकेडेमी अफ टुरिजम एन्ड होटेल म्यानेजमेन्टबाट ब्याचलर अफ ट्राभल एन्ड टुरिजम म्यानेजमेन्ट (बीटीटीएम) उत्तीर्ण गर्नुभएको थियो ।
उहाँले सन् २०१८ मा ग्लोबल कलेज अफ म्यानेजमेन्ट, काठमाडौंबाट व्यवस्थापन विषयमा कक्षा १२ उत्तीर्ण गर्नुभएको थियो । राजनीतिक रूपमा भने उहाँ काठमाडौं महानगरपालिकाका पूर्वमेयर बालेन्द्र साहको सचिवालयमा काम गर्दै आउनुभएको थियो । सोही क्रममा राष्ट्रिय स्वतन्त्र पार्टीले उहाँलाई मकवानपुर–२ बाट प्रतिनिधिसभा सदस्यको उम्मेदवार बनाएको थियो ।
