काठमाडौं– नेपाल स्टक एक्सचेञ्ज (नेप्से)ले वार्षिक नवीकरण शुल्क असोज मसान्तसम्म बुझाउन निर्देशन दिएको छ । आर्थिक वर्ष २०८१–०८२ को धितोपत्र शुल्क बुझाउनु बाँकी कम्पनीलाई नेप्सेले निर्देशन दिएको हो । तोकिएको समय नवीकरण शुल्क नबुझाए १० प्रतिशत जरिवाना लाग्ने नेप्सेले जनाएको छ ।
नेप्सेको अनुसार ५० करोडसम्मको चुक्ता पुँजी भएको कम्पनीले ५० हजार रुपैयाँ तोकेको छ भने ५० करोड भन्दा बढी चुक्ता पुँजी भएका कम्पले १ लाख रुपैयाँ नवीकरण शुल्क बुझाउन निर्देशन दिएको छ ।
त्यस्तै, ऋणपत्र-डिभेन्चर र सामूहिक लगानी कोष (म्युचुअल फण्ड)को ५० करोड रुपैयाँ चुक्ता पुँजी भएकाले २५ हजार रुपैयाँ र ५० करोड भन्दा बढी पुँजी भएकाले ५० हजार रुपैयाँ नवीकरण शुल्क लाग्ने नेप्सेले जनाएको छ ।
उक्त शुल्क नेप्सेको ग्लोबल आईएमइ बैंक कमलादीमा भएको खातामा बुझाउनुपर्ने छ ।
